लोकमतमधील मूळ बातमी
राजा हरिश्चंद्र की पुंडलिक?
(29-04-2012 : 00:19:48) |
||
- भारतीय सिनेसृष्टीची मुहूर्तमेढ कोणी रोवली?
मुंबई। दि. २८ (प्रतिनिधी) भारतीय सिनेसृष्टीची मुहूर्तमेढ कोणी रोवली, राजा हरिश्चंद्र की पुंडलिक? भारतीय सिनेसृष्टीच्या शतकमहोत्सवी वर्षाला सुरुवात करण्याची जोरदार तयारी सुरू असतानाच हा नवा वाद निर्माण झाला आहे. धुंडीराज गोविंद फाळके उर्फ दादासाहेब फाळके यांचा ३ मे १९१३ ला प्रदर्शित झालेला ‘राजा हरिश्चंद्र’ हा पहिला भारतीय मूकपट असल्याचे मानले जाते, पण फाळकेंच्याही आधी भारतीय सिनेसृष्टीची मुहूर्तमेढ रामचंद्र गोपाळ तोरणे उर्फ दादासाहेब यांनी रोवल्याचा दावा करण्यात आला आहे. तोरणेंनी १८ मे १९१२ रोजी ‘पुंडलिक’ नावाचा सिनेमा प्रदर्शित केल्याचा दावा मराठी सिनेनिर्माते तसेच इम्पाचे (इंडियान मोशन पिक्चर्स प्रोड्युसर्स असोसिएशन) संचालक विकास पाटील यांनी पत्रकार परिषदेत केला. न्यायालयाकडे धाव घेणार असल्याचे त्यांनी सांगितले. मूळचे सिंधुदुर्गकर असलेल्या दादासाहेब तोरणे यांनी नाटकाचे रेकॉर्डिंग केले. त्याची निगेटीव्ह लंडनहून डेव्हलप करून ‘पुंडलिक’ नावाने चित्रपट प्रदर्शित केला. १८ मे १९१२ रोजी कोरोनेशन या मुंबईतील सिनेमागृहात ‘पुंडलिक’ दोन आठवडे चालला, पण त्याला सिनेमा म्हणून मान्यता मिळाली नव्हती असे सांगण्यात येते. वर्षभरानंतर दादासाहेब फाळकेंचा ‘राजा हरिश्चंद्र’ हा मूकपट ‘कोरोनेशन’मध्येच प्रदर्शित झाला. पाटील यांच्या म्हणण्यानुसार तोरणेंचे कार्य महान असून आजवर त्यांना डावलण्यात आले आहे. त्यांच्या कार्याकडे दुर्लक्ष करण्यात आले आहे. हा स्टंट तर नव्हे ना? तोरणे घराण्याचे कोणीही वारस सोबत नसताना, तोरणेंचा ‘पुंडलिक’ला १00 वर्षे पूर्ण व्हायला केवळ २0 दिवस शिल्लक असताना हा मुद्दा उपस्थित केल्याने याला पब्लिसिटी स्टंट म्हटले जात आहे. वर्षभरापूर्वी हा मुद्दा उपस्थित न करता शतकमहोत्सवी वर्षानिमित्त शासनाच्या तसेच फिल्म सोसायट्यांच्या वतीने विविध कार्यक्रमांचे आयोजन केल्यावर हा मुद्दा उचलल्याने याकडे संशयाने पाहिले जात आहे. |
कोणत्याही टिप्पण्या नाहीत:
टिप्पणी पोस्ट करा